تمہارے خط میں نیا اک سلام کس کا تھا
نہ تھا رقیب تو آخر وہ نام کس کا تھا
tumhare khat mein naya ik salam kis ka tha
na tha raqib to aakhir wo nam kis ka tha
وہ قتل کر کے مجھے ہر کسی سے پوچھتے ہیں
یہ کام کس نے کیا ہے یہ کام کس کا تھا
wo qatl kar ke mujhe har kisi se puchhte hain
ye kaam kis ne kiya hai ye kaam kis ka tha
وفا کریں گے نباہیں گے بات مانیں گے
تمہیں بھی یاد ہے کچھ یہ کلام کس کا تھا
wafa karenge nibahenge baat manenge
tumhein bhi yaad hai kuchh ye kalam kis ka tha
رہا نہ دل میں وہ بے درد اور درد رہا
مقیم کون ہوا ہے مقام کس کا تھا
raha na dil mein wo be-dard aur dard raha
muqim kaun hua hai maqam kis ka tha
نہ پوچھ گچھ تھی کسی کی وہاں نہ آؤ بھگت
تمہاری بزم میں کل اہتمام کس کا تھا
na puchh-gachh thi kisi ki wahan na aao-bhagat
tumhari bazm mein kal ehtimam kis ka tha
تمام بزم جسے سن کے رہ گئی مشتاق
کہو وہ تذکرۂ ناتمام کس کا تھا
tamam bazm jise sun ke rah gai mushtaq
kaho wo tazkira-e-na-tamam kis ka tha
ہمارے خط کے تو پرزے کئے پڑھا بھی نہیں
سنا جو تو نے بہ دل وہ پیام کس کا تھا
hamare khat ke to purze kiye padha bhi nahin
suna jo tu ne ba-dil wo payam kis ka tha
گزر گیا وہ زمانہ کہوں تو کس سے کہوں
خیال دل کو مرے صبح و شام کس کا تھا
guzar gaya wo zamana kahun to kis se kahun
khayal dil ko mire subh o sham kis ka tha
اگرچہ دیکھنے والے ترے ہزاروں تھے
تباہ حال بہت زیر بام کس کا تھا
agarche dekhne wale tire hazaron the
tabah-hal bahut zer-e-baam kis ka tha
وہ کون تھا کہ تمہیں جس نے بے وفا جانا
خیال خام یہ سودائے خام کس کا تھا
wo kaun tha ki tumhein jis ne be-wafa jaana
khayal-e-kham ye sauda-e-kham kis ka tha
انہیں صفات سے ہوتا ہے آدمی مشہور
جو لطف عام وہ کرتے یہ نام کس کا تھا
inhin sifat se hota hai aadmi mashhur
jo lutf-e-aam wo karte ye nam kis ka tha
ہر اک سے کہتے ہیں کیا داغؔ بے وفا نکلا
یہ پوچھے ان سے کوئی وہ غلام کس کا تھا
har ik se kahte hain kya Dagh be-wafa nikla
ye puchhe un se koi wo ghulam kis ka tha
