تیرے کوچے میں جو ہم با دیدۂ تر بیٹھتے
جوش طوفاں سے زمیں میں سینکڑوں گھر بیٹھتے
tere kuche mein jo ham ba-dida-e-tar baiThte
josh-e-tufan se zamin mein sainkaDon ghar baiThte
چارہ گر بھی ہم نشیں تھا رات کو ناصح بھی تھا
ورنہ بیتابی سے ہم کیا جانے کیا کر بیٹھتے
chara-gar bhi ham-nashin tha raat ko naseh bhi tha
varna betabi se ham kya jaane kya kar baiThte
ہو گئی محفل تری کیا بے ادب بے قاعدہ
جو کھڑے رہتے تھے وہ اب ہیں برابر بیٹھتے
ho gai mahfil tiri kya be-adab be-qaida
jo khaDe rahte the vo ab hain barabar baiThte
جب کیا شکوہ کہ محفل میں رہے ہم تم سے دور
اس نے جھنجھلا کر کہا کیا میرے سر پر بیٹھتے
jab kiya shikva ki mahfil mein rahe ham tum se duur
us ne jhunjhla kar kaha kya mere sar par baiThte
جس کی قسمت میں ہو گردش کس طرح بیٹھے کہیں
ہم سے آوارہ ترے کوچے میں کیوں کر بیٹھتے
jis ki qismat mein ho gardish kis tarah baiThe kahin
ham se avara tire kuche mein kyunkar baiThte
داغؔ تم نے کیوں کیا ہے نام وحشت کا خراب
اس سے تو بہتر یہی تھا چین سے گھر بیٹھتے
Dagh tum ne kyun kiya hai naam vahshat ka kharab
is se to behtar yahi tha chain se ghar baiThte
