ادھر دیکھ لینا ادھر دیکھ لینا
کن انکھیوں سے اس کو مگر دیکھ لینا
Idhar dekh lena udhar dekh lena
Kan-ankhiyon se us ko magar dekh lena
فقط نبض سے حال ظاہر نہ ہوگا
مرا دل بھی اے چارہ گر دیکھ لینا
Faqat nabz se haal zaahir na hoga
Mira dil bhi ai chaara-gar dekh lena
نہ دینا خط شوق گھبرا کے پہلے
محل موقع اے نامہ بر دیکھ لینا
Na dena khat-e-shauq ghabra ke pahle
Mahal mauqa ai naama-bar dekh lena
کہیں ایسے بگڑے سنورتے بھی دیکھے
نہ آئیں گے وہ راہ پر دیکھ لینا
Kahin aise bigDe sanvarte bhi dekhe
Na aaenge vo raah par dekh lena
تغافل میں شوخی نرالی ادا تھی
غضب تھا وہ منہ پھیر کر دیکھ لینا
Taghaful mein shokhi niraali ada thi
Ghazab tha vo munh pher kar dekh lena
شب وعدہ اپنا یہی مشغلہ تھا
اٹھا کر نظر سوئے در دیکھ لینا
Shab-e-vaada apna yahi mashghala tha
UTha kar nazar su-e-dar dekh lena
بلایا جو غیروں کو دعوت میں تم نے
مجھے پیشتر اپنے گھر دیکھ لینا
Bulaaya jo ghairon ko daavat mein tum ne
Mujhe peshtar apne ghar dekh lena
محبت کے بازار میں اور کیا ہے
کوئی دل دکھائے اگر دیکھ لینا
Mohabbat ke baazaar mein aur kya hai
Koi dil dikhaae agar dekh lena
مرے سامنے غیر سے بھی اشارے
ادھر بھی ادھر دیکھ کر دیکھ لینا
Mire saamne ghair se bhi ishaare
Idhar bhi udhar dekh kar dekh lena
نہ ہو نازک اتنا بھی مشاطہ کوئی
دہن دیکھ لینا کمر دیکھ لینا
Na ho naazuk itna bhi mashshaata koi
Dahan dekh lena kamar dekh lena
تماشائے عالم کی فرصت ہے کس کو
غنیمت ہے بس اک نظر دیکھ لینا
Tamaasha-e-aalam ki fursat hai kis ko
Ghanimat hai bas ik nazar dekh lena
دیے جاتے ہیں آج کچھ لکھ کے تم کو
اسے وقت فرصت مگر دیکھ لینا
Diye jaate hain aaj kuchh likh ke tum ko
Use vaqt-e-fursat magar dekh lena
ہمیں جان دیں گے ہمیں مر مٹیں گے
ہمیں تم کسی وقت پر دیکھ لینا
Hamin jaan denge hamin mar miTenge
Hamin tum kisi vaqt par dekh lena
جلایا تو ہے داغؔ کے دل کو تم نے
مگر اس کا ہوگا اثر دیکھ لینا
Jalaaya to hai Dagh ke dil ko tum ne
Magar is ka hoga asar dekh lena
