بات میری کبھی سنی ہی نہیں
جانتے وہ بری بھلی ہی نہیں
baat meri kabhi suni hi nahin
jaante wo buri bhali hi nahin
دل لگی ان کی دل لگی ہی نہیں
رنج بھی ہے فقط ہنسی ہی نہیں
dil-lagi un ki dil-lagi hi nahin
ranj bhi hai faqat hansi hi nahin
اڑ گئی یوں وفا زمانے سے
کبھی گویا کسی میں تھی ہی نہیں
ud gai yun wafa zamane se
kabhi goya kisi mein thi hi nahin
جان کیا دوں کہ جانتا ہوں میں
تم نے یہ چیز لے کے دی ہی نہیں
jaan kya dun ki jaanta hun main
tum ne ye chiz le ke di hi nahin
ہم تو دشمن کو دوست کر لیتے
پر کریں کیا تری خوشی ہی نہیں
ham to dushman ko dost kar lete
par karen kya tiri khushi hi nahin
ہم تری آرزو پہ جیتے ہیں
یہ نہیں ہے تو زندگی ہی نہیں
ham tiri aarzu pe jite hain
ye nahin hai to zindagi hi nahin
دل لگی دل لگی نہیں ناصح
تیرے دل کو ابھی لگی ہی نہیں
dil-lagi dil-lagi nahin naseh
tere dil ko abhi lagi hi nahin
داغؔ کیوں تم کو بے وفا کہتا
وہ شکایت کا آدمی ہی نہیں
Dagh kyun tum ko be-wafa kahta
wo shikayat ka aadmi hi nahin
