عجب اپنا حال ہوتا جو وصال یار ہوتا
کبھی جان صدقے ہوتی کبھی دل نثار ہوتا
ajab apna haal hota jo visal-e-yar hota
kabhi jaan sadqe hoti kabhi dil nisar hota
جو تمہاری طرح تم سے کوئی جھوٹے وعدے کرتا
تمہیں منصفی سے کہہ دو تمہیں اعتبار ہوتا
jo tumhari tarah tum se koi jhuthe wade karta
tumhin munsifi se kah do tumhein etibar hota
غم عشق میں مزا تھا جو اسے سمجھ کے کھاتے
یہ وہ زہر ہے کہ آخر مے خوش گوار ہوتا
gham-e-ishq mein maza tha jo use samajh ke khate
ye wo zahr hai ki aakhir mai-e-khush-gawar hota
یہ مزہ تھا دل لگی کا کہ برابر آگ لگتی
نہ تجھے قرار ہوتا نہ مجھے قرار ہوتا
ye maza tha dil-lagi ka ki barabar aag lagti
na tujhe qarar hota na mujhe qarar hota
نہ مزا ہے دشمنی میں نہ ہے لطف دوستی میں
کوئی غیر غیر ہوتا کوئی یار یار ہوتا
na maza hai dushmani mein na hai lutf dosti mein
koi ghair ghair hota koi yar yar hota
ترے وعدے پر ستم گر ابھی اور صبر کرتے
اگر اپنی زندگی کا ہمیں اعتبار ہوتا
tire wade par sitamgar abhi aur sabr karte
agar apni zindagi ka hamein etibar hota
یہ وہ درد دل نہیں ہے کہ ہو چارہ ساز کوئی
اگر ایک بار مٹتا تو ہزار بار ہوتا
ye wo dard-e-dil nahin hai ki ho chara-saz koi
agar ek baar mitta to hazar baar hota
تمہیں ناز ہو نہ کیونکر کہ لیا ہے داغؔ کا دل
یہ رقم نہ ہاتھ لگتی نہ یہ افتخار ہوتا
tumhein naz ho na kyunkar ki liya hai Dagh ka dil
ye raqam na haath lagti na ye iftikhar hota
