ڈالی گئی جو فصل خزاں میں شجر سے ٹوٹ
ممکن نہیں ہری ہو سحاب بہار سے
dali gai jo fasl-e-khizan men shajar se tut
mumkin nahin hari ho sahab-e-bahar se
ہے لازوال عہد خزاں اس کے واسطے
کچھ واسطہ نہیں ہے اسے برگ و بار سے
hai la-zaval ahd-e-khizan us ke vaste
kuchh vasta nahin hai use barg-o-bar se
ہے تیرے گلستاں میں بھی فصل خزاں کا دور
خالی ہے جیب گل زر کامل عیار سے
hai tere gulistan men bhi fasl-e-khizan ka daur
khali hai jeb-e-gul zar-e-kamil-ayar se
جو نغمہ زن تھے خلوت اوراق میں طیور
رخصت ہوئے ترے شجر سایہ دار سے
jo naghma-zan the khalvat-e-auraq men tuyur
rukhsat hue tire shajar-e-saya-dar se
شاخ بریدہ سے سبق اندوز ہو کہ تو
ناآشنا ہے قاعدۂ روزگار سے
shakh-e-burida se sabaq-andoz ho ki tu
na-ashna hai qa'ida-e-rozgar se
ملت کے ساتھ رابطۂ استوار رکھ
پیوستہ رہ شجر سے امید بہار رکھ
millat ke saath rabita-e-ustuvar rakh
paivasta rah shajar se ummid-e-bahar rakh
