ہمدم دیرینہ کیسا ہے جہان رنگ و بو
سوز و ساز و درد و داغ و جستجو و آرزو
hamdam-e-derina kaisa hai jahan-e-rang-o-bu
soz-o-saz-o-dard-o-dagh-o-justuju-o-arzu
ہر گھڑی افلاک پر رہتی ہے تیری گفتگو
کیا نہیں ممکن کہ تیرا چاک دامن ہو رفو
har ghadi aflak par rahti hai teri guftagu
kya nahin mumkin ki tera chaak-e-daman ho rafu
آہ اے جبریل تو واقف نہیں اس راز سے
کر گیا سرمست مجھ کو ٹوٹ کر میرا سبو
aah ai Jibril tu vaqif nahin is raaz se
kar gaya sarmast mujh ko tut kar mera subu
اب یہاں میری گزر ممکن نہیں ممکن نہیں
کس قدر خاموش ہے یہ عالم بے کاخ و کو
ab yahan meri guzar mumkin nahin mumkin nahin
kis qadar khamosh hai ye alam-e-be-kakh-o-ku
جس کی نومیدی سے ہو سوز درون کائنات
اس کے حق میں تقنطو اچھا ہے یا لاتقنطوا
jis ki naumidi se ho soz-e-darun-e-kainat
us ke haq mein taqnatu achchha hai ya la-taqnatu
کھو دیئے انکار سے تو نے مقامات بلند
چشم یزداں میں فرشتوں کی رہی کیا آبرو
kho diye inkar se tu ne maqamat-e-buland
chashm-e-Yazdan mein farishton ki rahi kya aabru
ہے مری جرأت سے مشت خاک میں ذوق نمو
میرے فتنے جامۂ عقل و خرد کا تار و پو
hai meri jurat se musht-e-khak mein zauq-e-numu
mere fitne jama-e-aql-o-khirad ka tar-o-pu
دیکھتا ہے تو فقط ساحل سے رزم خیر و شر
کون طوفاں کے طمانچے کھا رہا ہے میں کہ تو
dekhta hai tu faqat sahil se razm-e-khair-o-shar
kaun tufan ke tamanche kha raha hai main ki tu
خضر بھی بے دست و پا الیاس بھی بے دست و پا
میرے طوفاں یم بہ یم دریا بہ دریا جو بہ جو
Khizr bhi be-dast-o-pa Ilyas bhi be-dast-o-pa
mere tufan yam-ba-yam darya-ba-darya ju-ba-ju
گر کبھی خلوت میسر ہو تو پوچھ اللہ سے
قصۂ آدم کو رنگیں کر گیا کس کا لہو
gar kabhi khalvat mayassar ho to puchh Allah se
qissa-e-Adam ko rangin kar gaya kis ka lahu
میں کھٹکتا ہوں دل یزداں میں کانٹے کی طرح
تو فقط اللہ ہو اللہ ہو اللہ ہو
main khatakta hun dil-e-Yazdan mein kante ki tarah
tu faqat Allah-hu Allah-hu Allah-hu
