اٹھو مری دنیا کے غریبوں کو جگا دو
کاخ امرا کے در و دیوار ہلا دو
utho miri duniya ke gharibon ko jaga do
kakh-e-umara ke dar-o-divar hila do
گرماؤ غلاموں کا لہو سوز یقیں سے
کنجشک فرومایہ کو شاہیں سے لڑا دو
garmao ghulamon ka lahu soz-e-yaqin se
kunjishk-e-faromaya ko shahin se lada do
سلطانی جمہور کا آتا ہے زمانہ
جو نقش کہن تم کو نظر آئے مٹا دو
sultani-e-jamhur ka aata hai zamana
jo naqsh-e-kuhan tum ko nazar aae mita do
جس کھیت سے دہقاں کو میسر نہیں روزی
اس کھیت کے ہر خوشۂ گندم کو جلا دو
jis khet se dehqan ko muyassar nahin rozi
us khet ke har khosha-e-gandum ko jala do
کیوں خالق و مخلوق میں حائل رہیں پردے
پیران کلیسا کو کلیسا سے اٹھا دو
kyun khaliq-o-makhluq men hail rahen parde
piran-e-kalisa ko kalisa se utha do
حق را بسجودے صنماں را بطوافے
بہتر ہے چراغ حرم و دیر بجھا دو
haq ra ba-sujude sanaman ra ba-tavafe
behtar hai charagh-e-haram-o-dair bujha do
میں ناخوش و بیزار ہوں مرمر کی سلوں سے
میرے لیے مٹی کا حرم اور بنا دو
main na-khush-o-bezar hun marmar ki silon se
mere liye mitti ka haram aur bana do
تہذیب نوی کارگہ شیشہ گراں ہے
آداب جنوں شاعر مشرق کو سکھا دو
tahzib-e-navi kargah-e-shisha-garan hai
adab-e-junun sha'ir-e-mashriq ko sikha do
