سرِ شام ایک مرغِ نغمہ پیرا
کسی ٹہنی پہ بیٹھا گا رہا تھا
Sar-e-sham ek murgh-e-naghma-pera
Kisi tehni pe baitha ga raha tha
چمکتی چیز اک دیکھی زمیں پر
اڑا طائر اسے جگنو سمجھ کر
Chamakti chiz ik dekhi zamin par
Ura tair use jugnu samajh kar
کہا جگنو نے او مرغِ نواریز!
نہ کر بے کس پہ منقارِ ہوس تیز
Kaha jugnu ne o murgh-e-nawa-rez!
Na kar bekas pe minqar-e-hawas tez
تجھے جس نے چہک، گل کو مہک دی
اسی اللہ نے مجھ کو چمک دی
Tujhe jis ne chahak, gul ko mahak di
Usi Allah ne mujh ko chamak di
لباسِ نور میں مستور ہوں میں
پتنگوں کے جہاں کا طور ہوں میں
Libas-e-noor mein mastur hun main
Patangon ke jahan ka Tur hun main
چہک تیری بہشتِ گوش اگر ہے
چمک میری بھی فردوسِ نظر ہے
Chahak teri bahisht-e-gosh agar hai
Chamak meri bhi firdaus-e-nazar hai
پروں کو میرے قدرت نے ضیا دی
تجھے اس نے صدائے دل ربا دی
Paron ko mere qudrat ne ziya di
Tujhe us ne sada-e-dilruba di
تری منقار کو گانا سکھایا
مجھے گلزار کی مشعل بنایا
Teri minqar ko gana sikhaya
Mujhe gulzar ki mashal banaya
چمک بخشی مجھے، آواز تجھ کو
دیا ہے سوز مجھ کو، ساز تجھ کو
Chamak bakhshi mujhe, awaz tujh ko
Diya hai soz mujh ko, saaz tujh ko
مخالف ساز کا ہوتا نہیں سوز
جہاں میں ساز کا ہے ہم نشیں سوز
Mukhalif saaz ka hota nahin soz
Jahan mein saaz ka hai ham-nashin soz
قیامِ بزمِ ہستی ہے انھی سے
ظہورِ اوج و پستی ہے انھی سے
Qiyam-e-bazm-e-hasti hai unhi se
Zuhur-e-auj-o-pasti hai unhi se
ہم آہنگی سے ہے محفل جہاں کی
اسی سے ہے بہار اس بوستاں کی
Ham-ahangi se hai mehfil jahan ki
Isi se hai bahar is bostan ki
