اے آفتاب! روح و روانِ جہاں ہے تو
شیرازہ بندِ دفترِ کون و مکاں ہے تو
Ae aftab! ruh-o-ravan-e-jahan hai tu
Shiraza-band-e-daftar-e-kaun-o-makan hai tu
باعث ہے تو وجود و عدم کی نمود کا
ہے سبز تیرے دم سے چمن ہست و بود کا
Bais hai tu vujud-o-adam ki namud ka
Hai sabz tere dam se chaman hast-o-bud ka
قائم یہ عنصروں کا تماشا تجھی سے ہے
ہر شے میں زندگی کا تقاضا تجھی سے ہے
Qaim ye unsuron ka tamasha tujhi se hai
Har shai mein zindagi ka taqaza tujhi se hai
ہر شے کو تیری جلوہ گری سے ثبات ہے
تیرا یہ سوز و ساز سراپا حیات ہے
Har shai ko teri jalva-gari se sabat hai
Tera ye soz-o-saz sarapa hayat hai
وہ آفتاب جس سے زمانے میں نور ہے
دل ہے، خرد ہے، روحِ رواں ہے، شعور ہے
Vo aftab jis se zamane mein noor hai
Dil hai, khirad hai, ruh-e-ravan hai, shuur hai
اے آفتاب! ہم کو ضیائے شعور دے
چشمِ خرد کو اپنی تجلی سے نور دے
Ae aftab! ham ko ziya-e-shuur de
Chashm-e-khirad ko apni tajalli se noor de
ہے محفلِ وجود کا ساماں طراز تو
یزدانِ ساکنانِ نشیب و فراز تو
Hai mahfil-e-vujud ka saman-taraz tu
Yazdan-e-sakinan-e-nasheb-o-faraz tu
تیرا کمال ہستیِ ہر جاندار میں
تیری نمود سلسلۂ کوہسار میں
Tera kamal hasti-e-har jandar mein
Teri namud silsila-e-kohsar mein
ہر چیز کی حیات کا پروردگار تو
زائیدگانِ نور کا ہے تاجدار تو
Har chiz ki hayat ka parvardigar tu
Zaidagan-e-noor ka hai tajdar tu
نے ابتدا کوئی نہ کوئی انتہا تری
آزادِ قیدِ اول و آخر ضیا تری
Ne ibtida koi na koi intiha tiri
Azad-e-qaid-e-avval-o-akhir ziya tiri
