ہے بلندی سے فلک بوس نشیمن میرا
ابرِ کہسار ہوں گل پاش ہے دامن میرا
کبھی صحرا، کبھی گلزار ہے مسکن میرا
شہر و ویرانہ مرا، بحر مرا، بن میرا
کسی وادی میں جو منظور ہو سونا مجھ کو
سبزۂ کوہ ہے مخمل کا بچھونا مجھ کو
Hai bulandi se falak-bos nasheman mera
Abr-e-kohsar hun gul-pash hai daman mera
Kabhi sahra, kabhi gulzar hai maskan mera
Shahr-o-virana mira, bahr mira, ban mera
Kisi vadi mein jo manzur ho sona mujh ko
Sabza-e-koh hai makhmal ka bichhauna mujh ko
مجھ کو قدرت نے سکھایا ہے درافشاں ہونا
ناقۂ شاہدِ رحمت کا حدی خواں ہونا
غم زدائے دلِ افسردۂ دہقاں ہونا
رونقِ بزمِ جوانانِ گلستاں ہونا
بن کے گیسو رخِ ہستی پہ بکھر جاتا ہوں
شانۂ موجۂ صرصر سے سنور جاتا ہوں
Mujh ko qudrat ne sikhaya hai dur-afshan hona
Naqa-e-shahid-e-rahmat ka hudi-khwan hona
Gham-zuda-e-dil-e-afsurda-e-dehqan hona
Raunaq-e-bazm-e-javanan-e-gulistan hona
Ban ke gesu rukh-e-hasti pe bikhar jata hun
Shana-e-mauja-e-sarsar se sanvar jata hun
دور سے دیدۂ امید کو ترساتا ہوں
کسی بستی سے جو خاموش گزر جاتا ہوں
سیر کرتا ہوا جس دم لبِ جو آتا ہوں
بالیاں نہر کو گرداب کی پہناتا ہوں
سبزۂ مزرعِ نوخیز کی امید ہوں میں
زادۂ بحر ہوں، پروردۂ خورشید ہوں میں
Door se dida-e-ummid ko tarsata hun
Kisi basti se jo khamosh guzar jata hun
Sair karta hua jis dam lab-e-ju aata hun
Baliyan nahr ko girdab ki pahnata hun
Sabza-e-mazra-e-naukhez ki ummid hun main
Zada-e-bahr hun, parvarda-e-khurshid hun main
چشمۂ کوہ کو دی شورشِ قلزم میں نے
اور پرندوں کو کیا محوِ ترنم میں نے
سر پہ سبزے کے کھڑے ہو کے کہا قم میں نے
غنچۂ گل کو دیا ذوقِ تبسم میں نے
فیض سے میرے نمونے ہیں شبستانوں کے
جھونپڑے دامنِ کہسار میں دہقانوں کے
Chashma-e-koh ko di shorish-e-qulzum main ne
Aur parindon ko kiya mahv-e-tarannum main ne
Sar pe sabze ke khade ho ke kaha qum main ne
Ghuncha-e-gul ko diya zauq-e-tabassum main ne
Faiz se mere namune hain shabistanon ke
Jhonpde daman-e-kohsar mein dehqanon ke
