کیا کاسۂ مے لیجئے اس بزم میں اے ہم نشیں
دور فلک سے کیا خبر پہنچے گا لب تک یا نہیں
Kya kasa-e-mai lijiye is bazm mein ai hum-nashin
Daur-e-falak se kya khabar pahunchega lab tak ya nahin
یہ کاسۂ فیروز گوں ہے شیشہ باز پر فنوں
جتنے حیل ہیں اور فسوں سب اس کے ہیں زیر نگیں
Ye kasa-e-firoza-gun hai shisha-baz-e-pur-funun
Jitne hiyal hain aur fusun sab is ke hain zer-e-nagin
ہو اعتماد اس کا کسے ہے شیشہ بازی یاد اسے
رکھتا ہے شاد اک دم جسے کرتا ہے پھر اندوہگیں
Ho aitmad is ka kise hai shisha-bazi yaad ise
Rakhta hai shad ik dam jise karta hai phir andohgin
کل دامن صحرا میں ہم گزرے جو وقت صبح دم
اک کاسۂ سر پر الم آیا نظر اپنے وہیں
Kal daman-e-sahra mein hum guzre jo waqt-e-subh-dam
Ik kasa-e-sar pur-alam aaya nazar apne wahin
بولا بہ فریاد و فغاں کیا دیکھتا ہے او میاں
تھے ہم بھی سر بر آسماں گو اب تو ہیں زیر زمیں
Bola ba-faryad-o-fughan kya dekhta hai o miyan
The hum bhi sar-bar-aasman go ab to hain zer-e-zamin
گلبرگ سے نازک بدن سر پاؤں سے رشک چمن
زریں و سیمیں پیرہن دل کش مکانوں کے مکیں
Gulbarg se nazuk badan sar paon se rashk-e-chaman
Zarrin-o-simin pairahan dilkash makanon ke makin
دن رات ناز و نعمتیں مہ طلعتوں کی صحبتیں
عیش و نشاط و عشرتیں ساقی قراں مطرب قریں
Din raat naz-o-nematen mah-talaton ki sohbaten
Aish-o-nishat-o-ishraten saqi qiran mutrib qarin
ایک آسماں کے دور سے اک گردش فی الفور سے
اب سوچیے گا غور سے در لحظہ آں در لحظہ ایں
Ek aasman ke daur se ik gardish-e-fil-faur se
Ab sochiyega ghaur se dar lahza aan dar lahza in
سنتے ہی جی تھرا گیا رخسار پر اشک آ گیا
دل عبرتوں سے چھا گیا خاطر ہوئی بس سہمگیں
Sunte hi ji tharra gaya rukhsar par ashk aa gaya
Dil ibraton se chha gaya khatir hui bas sahmgin
اس میں سر اپنا ناگہاں ہر مو ہوا مثل زباں
بولا نظیرؔ آگہ ہو ہاں من نیز روزے ہم چنیں
Is mein sar apna nagahan har mu hua misl-e-zaban
Bola Nazir aagah ho haan man niz roze ham chunin
