دل نہ لو دل کا یہ لینا ہے نہ اخفا ہوگا
اس کو دل کہتے ہیں بس لیتے ہی چرچا ہوگا
Dil na lo dil ka ye lena hai na ikhfa hoga
Is ko dil kahte hain bas lete hi charcha hoga
تم کو ہر آن ادھر ہووے گی حسن آرائی
ہم کو ہر لحظہ ادھر ذوق تماشا ہوگا
Tum ko har aan idhar howegi husn-aarai
Hum ko har lahza idhar zauq-e-tamasha hoga
ہم بھی سو چاہ سے دیکھیں گے تمہاری جانب
تم سے بھی ضبط تبسم نہ پھر اصلا ہوگا
Hum bhi sau chaah se dekhenge tumhari janib
Tum se bhi zabt-e-tabassum na phir asla hoga
جوں ہی ہم دیکھیں گے تم اور تبسم ہو گے
چاہ کا غنچۂ سربستہ وہیں وا ہوگا
Jun hi hum dekhenge tum aur tabassum hoge
Chaah ka ghuncha-e-sar-basta wahin wa hoga
گفتگو ہووے گی باہم جو اشارات کے ساتھ
متن اس کا بھی حریفوں میں محشا ہوگا
Guftugu howegi baham jo isharat ke saath
Matn us ka bhi harifon mein muhashsha hoga
پاؤں تک ہاتھ جو لاویں گے کسی عذر سے ہم
تاڑنے والوں میں شور اس کا بھی برپا ہوگا
Paon tak haath jo lawenge kisi uzr se hum
Taadne walon mein shor us ka bhi barpa hoga
جب یہ تقریر سنی اس شہ خوباں نے نظیرؔ
ہم سے دل لے لیا اور ہنس کے کہا کیا ہوگا
Jab ye taqrir suni us shah-e-khooban ne Nazir
Hum se dil le liya aur hans ke kaha kya hoga
