جن کے لیے اپنے تو یوں جان نکلتے ہیں
اس راہ میں وے جیسے انجان نکلتے ہیں
jin ke liye apne to yun jaan nikalte hain
is raah mein we jaise anjaan nikalte hain
کیا تیر ستم اس کے سینے میں بھی ٹوٹے تھے
جس زخم کو چیروں ہوں پیکان نکلتے ہیں
kya teer-e-sitam us ke seene mein bhi tute the
jis zakhm ko chiron hun paikan nikalte hain
مت سہل ہمیں جانو پھرتا ہے فلک برسوں
تب خاک کے پردے سے انسان نکلتے ہیں
mat sahl hamein jaano phirta hai falak barson
tab khak ke parde se insaan nikalte hain
کس کا ہے قماش ایسا گودڑ بھرے ہیں سارے
دیکھو نہ جو لوگوں کے دیوان نکلتے ہیں
kis ka hai qumash aisa gudad bhare hain saare
dekho na jo logon ke diwan nikalte hain
گہ لوہو ٹپکتا ہے گہ لخت دل آنکھوں سے
یا ٹکڑے جگر ہی کے ہر آن نکلتے ہیں
gah lohu tapakta hai gah lakht-e-dil aankhon se
ya tukde jigar hi ke har aan nikalte hain
کریے تو گلہ کس سے جیسی تھی ہمیں خواہش
اب ویسے ہی یہ اپنے ارمان نکلتے ہیں
kariye to gila kis se jaisi thi hamein khwahish
ab waise hi ye apne armaan nikalte hain
جاگہ سے بھی جاتے ہو منہ سے بھی خشن ہو کر
وے حرف نہیں ہیں جو شایان نکلتے ہیں
jaaga se bhi jaate ho munh se bhi khashin ho kar
we harf nahin hain jo shayan nikalte hain
سو کاہے کو اپنی تو جوگی کی سی پھیری ہے
برسوں میں کبھو ایدھر ہم آن نکلتے ہیں
so kahe ko apni to jogi ki si pheri hai
barson mein kabhu edhar hum aan nikalte hain
ان آئینہ رویوں کے کیا میرؔ بھی عاشق ہیں
جب گھر سے نکلتے ہیں حیران نکلتے ہیں
in aaina-ruyon ke kya Mir bhi aashiq hain
jab ghar se nikalte hain hairan nikalte hain
