ہوتی ہے گرچہ کہنے سے یارو پرائی بات
پر ہم سے تو تھنبے نہ کبھو منہ پر آئی بات
hoti hai garche kahne se yaaro parai baat
par ham se to thambe na kabhu munh par aai baat
جانے نہ تجھ کو جو یہ تصنع تو اس سے کر
تس پر بھی تو چھپی نہیں رہتی بنائی بات
jaane na tujh ko jo ye tasanno to us se kar
tis par bhi to chhupi nahin rahti banai baat
لگ کر تدرو رہ گئے دیوار باغ سے
رفتار کی جو تیری صبا نے چلائی بات
lag kar tadarv rah gaye diwar-e-baagh se
raftar ki jo teri saba ne chalai baat
کہتے تھے اس سے ملیے تو کیا کیا نہ کہیے لیک
وہ آ گیا تو سامنے اس کے نہ آئی بات
kahte the us se miliye to kya kya na kahiye lek
vo aa gaya to saamne us ke na aai baat
اب تو ہوئے ہیں ہم بھی ترے ڈھب سے آشنا
واں تو نے کچھ کہا کہ ادھر ہم نے پائی بات
ab to hue hain ham bhi tire dhab se aashna
vaan tu ne kuchh kaha ki idhar ham ne pai baat
بلبل کے بولنے میں سب انداز ہیں مرے
پوشیدہ کب رہے ہے کسو کی اڑائی بات
bulbul ke bolne mein sab andaz hain mire
poshida kab rahe hai kisu ki udai baat
بھڑکا تھا رات دیکھ کے وہ شعلہ خو مجھے
کچھ رو سیہ رقیب نے شاید لگائی بات
bhadka tha raat dekh ke vo shola-khu mujhe
kuchh ru-siyah raqib ne shayad lagai baat
عالم سیاہ خانہ ہے کس کا کہ روز و شب
یہ شور ہے کہ دیتی نہیں کچھ سنائی بات
aalam siyah-khana hai kis ka ki roz-o-shab
ye shor hai ki deti nahin kuchh sunai baat
اک دن کہا تھا یہ کہ خموشی میں ہے وقار
سو مجھ سے ہی سخن نہیں میں جو بتائی بات
ik din kaha tha ye ki khamoshi mein hai waqar
so mujh se hi sukhan nahin main jo batai baat
اب مجھ ضعیف و زار کو مت کچھ کہا کرو
جاتی نہیں ہے مجھ سے کسو کی اٹھائی بات
ab mujh za'if-o-zar ko mat kuchh kaha karo
jaati nahin hai mujh se kisu ki uthai baat
خط لکھتے لکھتے میرؔ نے دفتر کیے رواں
افراط اشتیاق نے آخر بڑھائی بات
khat likhte likhte 'Mir' ne daftar kiye ravan
ifrat-e-ishtiyaq ne aakhir badhai baat
