گزرا بنائے چرخ سے نالہ پگاہ کا
خانہ خراب ہو جیو اس دل کی چاہ کا
guzra bina-e-charkh se naala pagaah ka
khaana-kharaab ho jiyo is dil ki chaah ka
آنکھوں میں جی مرا ہے ادھر دیکھتا نہیں
مرتا ہوں میں تو ہائے رے صرفہ نگاہ کا
aankhon mein ji mira hai idhar dekhta nahin
marta hoon main to haae re sarfa nigaah ka
صد خانماں خراب ہیں ہر ہر قدم پہ دفن
کشتہ ہوں یار میں تو ترے گھر کی راہ کا
sad khaanumaan-kharaab hain har har qadam pe dafn
kushta hoon yaar main to tire ghar ki raah ka
تلوار مارنا تو تمہیں کھیل ہے ولے
جاتا رہے نہ جان کسو بے گناہ کا
talwaar maarna to tumhen khel hai wale
jaata rahe na jaan kisu be-gunaah ka
بدنام و خوار و زار و نزار و شکستہ حال
احوال کچھ نہ پوچھیے اس رو سیاہ کا
badnaam-o-khwaar-o-zaar-o-nizaar-o-shikasta-haal
ahwaal kuchh na poochhiye is roo-siyaah ka
ظالم زمیں سے لوٹتا دامن اٹھا کے چل
ہوگا کمیں میں ہاتھ کسو داد خواہ کا
zaalim zameen se lotta daaman utha ke chal
hoga kameen mein haath kisu daad-khwaah ka
ہر لخت دل میں صید کے پیکان بھی گئے
دیکھا میں شوخ ٹھاٹھ تری صید گاہ کا
har lakht-e-dil mein said ke paikaan bhi gaye
dekha main shokh thaath tiri said-gaah ka
بیمار تو نہ ہووے جیے جب تلک کہ میرؔ
سونے نہ دے گا شور تری آہ آہ کا
beemaar tu na howe jiye jab talak ki Mir
sone na dega shor tiri aah aah ka
