سودا ہے جو دل دے کے خریدار سے الجھے
سلجھے ہوئے ہم سے نہ کبھی یار سے الجھے
sauda hai jo dil de ke kharidar se uljhe
suljhe hue ham se na kabhi yaar se uljhe
ہونے نہ دیا رشک نے اظہار تمنا
ہر بات میں ہم اپنی ہی گفتار سے الجھے
hone na diya rashk ne izhar-e-tamanna
har baat mein ham apni hi guftar se uljhe
کیا سیر ہو شانے سے لڑے گر دل صد چاک
ایک ایک گرفتار گرفتار سے الجھے
kya sair ho shane se laDe gar dil-e-sad-chak
ek ek giraftar giraftar se uljhe
اٹکے تو کسی چشم فسوں ساز سے اٹکے
الجھے تو کسی طرۂ طرار سے الجھے
aTke to kisi chashm-e-fusun-saz se aTke
uljhe to kisi turra-e-tarrar se uljhe
چوری سے بھی پہنچے نہ ترے گھر میں کبھی ہم
برسوں یوں ہی خار سر دیوار سے الجھے
chori se bhi pahunche na tire ghar mein kabhi ham
barson yunhi khar-e-sar-e-divar se uljhe
کھلتے نہیں تم داغؔ الجھتی ہے طبیعت
اچھے کسی عیار سے مکار سے الجھے
khulte nahin tum Dagh ulajhti hai tabiat
achchhe kisi ayyar se makkar se uljhe
