سب سے تم اچھے ہو تم سے مری قسمت اچھی
یہی کم بخت دکھا دیتی ہے صورت اچھی
sab se tum achchhe ho tum se miri qismat achchhi
yahi kam-bakht dikha deti hai surat achchhi
حسن معشوق سے بھی حسن سخن ہے کم یاب
ایک ہوتی ہے ہزاروں میں طبیعت اچھی
husn-e-mashooq se bhi husn-e-sukhan hai kamyab
ek hoti hai hazaron mein tabiat achchhi
میری تصویر بھی دیکھی تو کہا شرما کر
یہ برا شخص ہے اس کی نہیں نیت اچھی
meri tasvir bhi dekhi to kaha sharma kar
ye bura shakhs hai is ki nahin niyyat achchhi
کس صفائی سے کیا وصل کا تو نے انکار
اس محل پر تو زباں میں تری لکنت اچھی
kis safai se kiya vasl ka tu ne inkar
is mahal par to zaban mein teri luknat achchhi
جو ہو آغاز میں بہتر وہ خوشی ہے بد تر
جس کا انجام ہو اچھا وہ مصیبت اچھی
jo ho aaghaz mein behtar vo khushi hai badtar
jis ka anjam ho achchha vo musibat achchhi
تم بتاؤ تو سہی مہر و محبت کے گواہ
ایسے دعوے میں تو جھوٹی ہی شہادت اچھی
tum batao to sahi mehr-o-mohabbat ke gavah
aise daave mein to jhuti hi shahadat achchhi
زور و زر سے بھی کہیں داغؔ حسیں ملتے ہیں
اپنے نزدیک تو ہے سب سے اطاعت اچھی
zor-o-zar se bhi kahin Dagh hasin milte hain
apne nazdik to hai sab se itaat achchhi
