چاک ہو پردۂ وحشت مجھے منظور نہیں
ورنہ یہ ہاتھ گریبان سے کچھ دور نہیں
chaak ho parda-e-vahshat mujhe manzur nahin
varna ye haath gireban se kuchh duur nahin
لب تک آئی تھی شکایت کہ محبت نے کہا
دیکھ پچھتائے گا خاموش یہ دستور نہیں
lab tak aai thi shikayat ki mohabbat ne kaha
dekh pachhtaega khamosh ye dastur nahin
رات دن نامہ و پیغام کہاں تک ہوں گے
صاف کہہ دیجئے ملنا ہمیں منظور نہیں
raat din nama-o-paigham kahan tak honge
saaf kah dijiye milna hamein manzur nahin
تم نے دی کوہ کن و قیس سے مجھ کو نسبت
کوئی دیوانہ نہیں میں کوئی مزدور نہیں
tum ne di koh-kan-o-qais se mujh ko nisbat
koi divana nahin main koi mazdur nahin
کیا کرے داغؔ کوئی اس کی محبت کا علاج
وہ کلیجہ ہی نہیں جس میں یہ ناسور نہیں
kya kare Dagh koi us ki mohabbat ka ilaj
vo kaleja hi nahin jis mein ye nasur nahin
