ابھی ہماری محبت کسی کو کیا معلوم
کسی کے دل کی حقیقت کسی کو کیا معلوم
abhi hamari mohabbat kisi ko kya maalum
kisi ke dil ki haqiqat kisi ko kya maalum
یقیں تو یہ ہے وہ خط کا جواب لکھیں گے
مگر نوشتۂ قسمت کسی کو کیا معلوم
yaqin to ye hai wo khat ka jawab likhenge
magar navishta-e-qismat kisi ko kya maalum
بظاہر ان کو حیا دار لوگ سمجھے ہیں
حیا میں جو ہے شرارت کسی کو کیا معلوم
ba-zahir un ko haya-dar log samjhe hain
haya mein jo hai shararat kisi ko kya maalum
جو سخت بات سنے دل تو ٹوٹ جاتا ہے
اس آئینے کی نزاکت کسی کو کیا معلوم
jo sakht baat sune dil to tut jata hai
is aaine ki nazakat kisi ko kya maalum
کیا کریں وہ سنانے کو پیار کی باتیں
انہیں ہے مجھ سے عداوت کسی کو کیا معلوم
kiya karen wo sunane ko pyar ki baaten
unhen hai mujh se adawat kisi ko kya maalum
جناب داغؔ کے مشرب کو ہم سے تو پوچھو
چھپے ہوئے ہیں یہ حضرت کسی کو کیا معلوم
janab-e-Dagh ke mashrab ko ham se to puchho
chhupe hue hain ye hazrat kisi ko kya maalum
