وارستہ اس سے ہیں کہ محبّت ہی کیوں نہ ہو
کیجے ہمارے ساتھ، عداوت ہی کیوں نہ ہو
Waarasta us se hain ki mohabbat hi kyun na ho
Kije hamare saath adaawat hi kyun na ho
چھوڑا نہ مجھ میں ضعف نے رنگ اختلاط کا
ہے دل پہ بار، نقشِ محبّت ہی کیوں نہ ہو
Chhoda na mujh mein zof ne rang ikhtilaat ka
Hai dil pe baar naqsh-e-mohabbat hi kyun na ho
ہے مجھ کو تجھ سے تذکرۂ غیر کا گلہ
ہر چند بر سبیلِ شکایت ہی کیوں نہ ہو
Hai mujh ko tujh se tazkira-e-ghair ka gila
Har chand bar-sabeel-e-shikayat hi kyun na ho
پیدا ہوئی ہے، کہتے ہیں، ہر درد کی دوا
یوں ہو تو چارۂ غمِ الفت ہی کیوں نہ ہو
Paida hui hai kahte hain har dard ki dawa
Yun ho to chaara-e-gham-e-ulfat hi kyun na ho
ڈالا نہ بیکسی نے کسی سے معاملہ
اپنے سے کھینچتا ہوں خجالت ہی کیوں نہ ہو
Daala na bekasi ne kisi se muamla
Apne se khainchta hun khajaalat hi kyun na ho
ہنگامۂ زبونئِ ہمّت ہے، انفعال
حاصل نہ کیجے دہر سے، عبرت ہی کیوں نہ ہو
Hangaama-e-zabooni-e-himmat hai infiaal
Haasil na kije dahr se ibrat hi kyun na ho
وارستگی بہانۂ بیگانگی نہیں
اپنے سے کر، نہ غیر سے، وحشت ہی کیوں نہ ہو
Waarastagi bahaana-e-begaanagi nahin
Apne se kar na ghair se wahshat hi kyun na ho
