درد سے میرے ہے تجھ کو بے قراری ہائے ہائے
کیا ہوئی ظالم تری غفلت شعاری ہائے ہائے
Dard se mere hai tujh ko beqarari haae haae
Kya hui zalim teri ghaflat-shiari haae haae
تیرے دل میں گر نہ تھا آشوبِ غم کا حوصلہ
تو نے پھر کیوں کی تھی میری غم گساری ہائے ہائے
Tere dil mein gar na tha aashob-e-gham ka hausla
Tu ne phir kyun ki thi meri gham-gusari haae haae
کیوں مری غم خوارگی کا تجھ کو آیا تھا خیال
دشمنی اپنی تھی میری دوست داری ہائے ہائے
Kyun meri ghamkhwargi ka tujh ko aaya tha khayal
Dushmani apni thi meri dost-dari haae haae
عمر بھر کا تو نے پیمانِ وفا باندھا تو کیا
عمر کو بھی تو نہیں ہے پائداری ہائے ہائے
Umr bhar ka tu ne paiman-e-wafa bandha to kya
Umr ko bhi to nahin hai paidari haae haae
زہر لگتی ہے مجھے آب و ہوائے زندگی
یعنی تجھ سے تھی اسے نا سازگاری ہائے ہائے
Zahr lagti hai mujhe aab-o-hawa-e-zindagi
Yani tujh se thi use na-sazgari haae haae
گل فشانی ہائے نازِ جلوہ کو کیا ہو گیا
خاک پر ہوتی ہے تیری لالہ کاری ہائے ہائے
Gul-fishani-ha-e-naz-e-jalwa ko kya ho gaya
Khaak par hoti hai teri lala-kari haae haae
شرمِ رسوائی سے جا چھپنا نقابِ خاک میں
ختم ہے الفت کی تجھ پر پردہ داری ہائے ہائے
Sharm-e-ruswai se ja chhupna naqab-e-khaak mein
Khatm hai ulfat ki tujh par parda-dari haae haae
خاک میں ناموسِ پیمانِ محبّت مل گئی
اٹھ گئی دنیا سے راہ و رسمِ یاری ہائے ہائے
Khaak mein namoos-e-paiman-e-mohabbat mil gayi
Uth gayi duniya se raah-o-rasm-e-yari haae haae
ہاتھ ہی تیغ آزما کا کام سے جاتا رہا
دل پہ اک لگنے نہ پایا زخمِ کاری ہائے ہائے
Haath hi tegh-aazma ka kaam se jaata raha
Dil pe ik lagne na paya zakhm-e-kari haae haae
کس طرح کاٹے کوئی شب ہائے تارِ برشکال
ہے نظر خو کردۂ اختر شماری ہائے ہائے
Kis tarah kaate koi shab-ha-e-taar-e-barshikal
Hai nazar khu-karda-e-akhtar-shumari haae haae
گوش مہجورِ پیام و چشم محرومِ جمال
ایک دل تِس پر یہ نا امّیدواری ہائے ہائے
Gosh mahjoor-e-payam-o-chashm mahroom-e-jamal
Ek dil tis par ye na-ummeedwari haae haae
عشق نے پکڑا نہ تھا غالب ابھی وحشت کا رنگ
رہ گیا تھا دل میں جو کچھ ذوقِ خواری ہائے ہائے
Ishq ne pakda na tha Ghalib abhi wahshat ka rang
Rah gaya tha dil mein jo kuchh zauq-e-khwari haae haae
