سب کہاں؟ کچھ لالہ و گل میں نمایاں ہو گئیں
خاک میں کیا صورتیں ہوں گی کہ پنہاں ہو گئیں!
Sab kahan kuchh lala-o-gul mein numayan ho gayin
Khaak mein kya sooraten hongi ki pinhan ho gayin
یاد تھیں ہم کو بھی رنگارنگ بزم آرائیاں
لیکن اب نقش و نگارِ طاقِ نسیاں ہو گئیں
Yaad thin hum ko bhi rang-a-rang bazm-araiyan
Lekin ab naqsh-o-nigar-e-taaq-e-nisyan ho gayin
تھیں بنات النعشِ گردوں دن کو پردے میں نہاں
شب کو ان کے جی میں کیا آئی کہ عریاں ہو گئیں
Thin banat-un-naash-e-gardoon din ko parde mein nihan
Shab ko un ke ji mein kya aai ki uryan ho gayin
جوئے خوں آنکھوں سے بہنے دو کہ ہے شامِ فراق
میں یہ سمجھوں گا کہ شمعیں دو فروزاں ہو گئیں
Jo-e-khoon aankhon se bahne do ki hai sham-e-firaq
Main ye samjhunga ki shamen do farozan ho gayin
نیند اس کی ہے، دماغ اس کا ہے، راتیں اس کی ہیں
تیری زلفیں جس کے بازو پر پریشاں ہو گئیں
Neend us ki hai dimagh us ka hai raaten us ki hain
Teri zulfen jis ke bazu par pareshan ho gayin
میں چمن میں کیا گیا گویا دبستاں کھل گیا
بلبلیں سن کر مرے نالے غزل خواں ہو گئیں
Main chaman mein kya gaya goya dabistan khul gaya
Bulbulen sun kar mere naale ghazal-khwan ho gayin
وہ نگاہیں کیوں ہوئی جاتی ہیں یارب دل کے پار؟
جو مری کوتاہیِ قسمت سے مژگاں ہو گئیں
Woh nigahen kyun hui jaati hain ya rab dil ke paar
Jo meri kotahi-e-qismat se mizhgan ho gayin
بس کہ روکا میں نے اور سینے میں ابھریں پے بہ پے
میری آہیں بخیۂ چاکِ گریباں ہو گئیں
Bas ki roka main ne aur seene mein ubhrin pai-ba-pai
Meri aahen bakhiya-e-chaak-e-gareban ho gayin
واں گیا بھی میں تو ان کی گالیوں کا کیا جواب؟
یاد تھیں جتنی دعائیں صرفِ درباں ہو گئیں
Waan gaya bhi main to un ki gaaliyon ka kya jawab
Yaad thin jitni duaen sarf-e-darban ho gayin
جاں فزا ہے بادہ جس کے ہاتھ میں جام آ گیا
سب لکیریں ہاتھ کی گویا، رگِ جاں ہو گئیں
Jaan-faza hai baada jis ke haath mein jaam aa gaya
Sab lakeeren haath ki goya rag-e-jaan ho gayin
رنج سے خوگر ہوا انساں تو مٹ جاتا ہے رنج
مشکلیں مجھ پر پڑیں اتنی کہ آساں ہو گئیں
Ranj se khugar hua insan to mit jaata hai ranj
Mushkilen mujh par padin itni ki aasan ho gayin
یوں ہی گر روتا رہا غالب تو اے اہلِ جہاں
دیکھنا ان بستیوں کو تم کہ ویراں ہو گئیں
Yun hi gar rota raha Ghalib to ai ahl-e-jahan
Dekhna in bastiyon ko tum ki veeran ho gayin
