کب وہ سنتا ہے کہانی میری
اور پھر وہ بھی زبانی میری
Kab woh sunta hai kahani meri
Aur phir woh bhi zabani meri
خلش غمزۂ خوں ریز نہ پوچھ
دیکھ خونابہ فشانی میری
Khalish-e-ghamza-e-khoon-rez na poochh
Dekh khoonaba-fishani meri
کیا بیاں کر کے مرا روئیں گے یار
مگر آشفتہ بیانی میری
Kya bayan kar ke mera roenge yaar
Magar aashufta-bayani meri
ہوں زخود رفتۂ بیدائے خیال
بھول جانا ہے نشانی میری
Hoon za-khud-rafta-e-baida-e-khayal
Bhool jaana hai nishani meri
متقابل ہے مقابل میرا
رک گیا دیکھ روانی میری
Mutaqabil hai muqabil mera
Ruk gaya dekh rawani meri
قدر سنگ سر رہ رکھتا ہوں
سخت ارزاں ہے گرانی میری
Qadr-e-sang-e-sar-e-rah rakhta hoon
Sakht arzan hai girani meri
گرد باد رہ بیتابی ہوں
صرصر شوق ہے بانی میری
Gard-baad-e-rah-e-betabi hoon
Sarsar-e-shauq hai baani meri
دہن اس کا جو نہ معلوم ہوا
کھل گئی ہیچ مدانی میری
Dahan us ka jo na maloom hua
Khul gayi hech-madani meri
کر دیا ضعف نے عاجز غالبؔ
ننگ پیری ہے جوانی میری
Kar diya za'f ne aajiz Ghalib
Nang-e-peeri hai jawani meri
