گھر جب بنا لیا ترے در پر کہے بغیر
جانے گا اب بھی تو نہ مرا گھر کہے بغیر؟
Ghar jab bana liya tere dar par kahe baghair
Janega ab bhi tu na mera ghar kahe baghair?
کہتے ہیں جب رہی نہ مجھے طاقتِ سخن
’جانوں کسی کے دل کی میں کیونکر کہے بغیر‘
Kahte hain jab rahi na mujhe taqat-e-sukhan
'Janun kisi ke dil ki main kyunkar kahe baghair'
کام اس سے آ پڑا ہے کہ جس کا جہان میں
لیوے نہ کوئی نام ستم گر کہے بغیر
Kaam us se aa pada hai ki jis ka jahan mein
Leve na koi naam sitamgar kahe baghair
جی میں ہی کچھ نہیں ہے ہمارے وگرنہ ہم
سر جائے یا رہے، نہ رہیں پر کہے بغیر
Ji mein hi kuchh nahin hai hamare wagarna hum
Sar jaye ya rahe, na rahen par kahe baghair
مقصد ہے ناز و غمزہ ولے گفتگو میں کام
چلتا نہیں ہے دُشنہ و خنجر کہے بغیر
Maqsad hai naz-o-ghamza wale guftagu mein kaam
Chalta nahin hai dushna-o-khanjar kahe baghair
ہر چند ہو مشاہدۂ حق کی گفتگو
بنتی نہیں ہے بادہ و ساغر کہے بغیر
Har-chand ho mushahida-e-haq ki guftagu
Banti nahin hai bada-o-saghar kahe baghair
بہرا ہوں میں، تو چاہیے دونا ہو التفات
سنتا نہیں ہوں بات مکرّر کہے بغیر
Bahra hun main, to chahiye duna ho iltifat
Sunta nahin hun baat mukarrar kahe baghair
غالب نہ کر حضور میں تو بار بار عرض
ظاہر ہے تیرا حال سب اُن پر کہے بغیر
Ghalib na kar huzur mein tu baar baar arz
Zahir hai tera haal sab un par kahe baghair
