تذکرہ دہلی مرحوم کا اے دوست نہ چھیڑ
نہ سنا جائے گا ہم سے یہ فسانا ہرگز
Tazkira Dehli-e-marhum ka ae dost na chhed
Na suna jayega hum se ye fasana hargiz
داستاں گل کی خزاں میں نہ سنا اے بلبل
ہنستے ہنستے ہمیں ظالم نہ رلانا ہرگز
Dastan gul ki khizan mein na suna ae bulbul
Hanste hanste hamein zalim na rulana hargiz
ڈھونڈھتا ہے دل شوریدہ بہانے مطرب
دردانگیز غزل کوئی نہ گانا ہرگز
Dhoondhta hai dil-e-shorida bahane mutrib
Dard-angez ghazal koi na gana hargiz
صحبتیں اگلی مصور ہمیں یاد آئیں گی
کوئی دلچسپ مرقع نہ دکھانا ہرگز
Sohbaten agli musawwir hamein yaad aayengi
Koi dilchasp muraqqa na dikhana hargiz
لے کے داغ آئے گا سینے پہ بہت اے سیاح
دیکھ اس شہر کے کھنڈروں میں نہ جانا ہرگز
Le ke daagh aayega seene pe bahut ae sayyah
Dekh is shehar ke khandaron mein na jana hargiz
چپہ چپہ پہ ہیں یاں گوہر یکتا تہ خاک
دفن ہوگا نہ کہیں اتنا خزانہ ہرگز
Chappa chappa pe hain yan gauhar-e-yakta tah-e-khak
Dafn hoga na kahin itna khazana hargiz
مٹ گئے تیرے مٹانے کے نشاں بھی اب تو
اے فلک اس سے زیادہ نہ مٹانا ہرگز
Mit gaye tere mitane ke nishan bhi ab to
Ae falak is se ziyada na mitana hargiz
وہ تو بھولے تھے ہمیں ہم بھی انہیں بھول گئے
ایسا بدلا ہے نہ بدلے گا زمانا ہرگز
Wo to bhoole the hamein hum bhi unhen bhool gaye
Aisa badla hai na badlega zamana hargiz
جس کو زخموں سے حوادث کے اچھوتا سمجھیں
نظر آتا نہیں اک ایسا گھرانا ہرگز
Jis ko zakhmon se hawadis ke achhuta samjhen
Nazar aata nahin ik aisa gharana hargiz
ہم کو گر تو نے رلایا تو رلایا اے چرخ
ہم پہ غیروں کو تو ظالم نہ ہنسانا ہرگز
Hum ko gar tu ne rulaya to rulaya ae charkh
Hum pe ghairon ko to zalim na hansana hargiz
آخری دور میں بھی تجھ کو قسم ہے ساقی
بھر کے اک جام نہ پیاسوں کو پلانا ہرگز
Aakhiri daur mein bhi tujh ko qasam hai saqi
Bhar ke ik jaam na pyason ko pilana hargiz
بخت سوئے ہیں بہت جاگ کے اے دور زماں
نہ ابھی نیند کے ماتوں کو جگانا ہرگز
Bakht soye hain bahut jaag ke ae daur-e-zaman
Na abhi neend ke maton ko jagana hargiz
کبھی اے علم و ہنر گھر تھا تمہارا دلی
ہم کو بھولے ہو تو گھر بھول نہ جانا ہرگز
Kabhi ae ilm o hunar ghar tha tumhara Dilli
Hum ko bhoole ho to ghar bhool na jana hargiz
غالبؔ و شیفتہؔ و نیرؔ و آزردہؔ و ذوقؔ
اب دکھائے گا نہ شکلوں کو زمانا ہرگز
Ghalib o Shefta o Nayyar o Azurda o Zauq
Ab dikhayega na shaklon ko zamana hargiz
مومنؔ و علویؔ و صہبائیؔ و ممنونؔ کے بعد
شعر کا نام نہ لے گا کوئی دانا ہرگز
Momin o Alvi o Sahbai o Mamnun ke baad
Sher ka naam na lega koi dana hargiz
داغؔ و مجروحؔ کو سن لو کہ پھر اس گلشن میں
نہ سنے گا کوئی بلبل کا ترانا ہرگز
Dagh o Majruh ko sun lo ke phir is gulshan mein
Na sunega koi bulbul ka tarana hargiz
رات آخر ہوئی اور بزم ہوئی زیر و زبر
اب نہ دیکھو گے کبھی لطف شبانہ ہرگز
Raat aakhir hui aur bazm hui zer o zabar
Ab na dekhoge kabhi lutf-e-shabana hargiz
بزم ماتم تو نہیں بزم سخن ہے حالیؔ
یاں مناسب نہیں رو رو کے رلانا ہرگز
Bazm-e-matam to nahin bazm-e-sukhan hai Hali
Yan munasib nahin ro ro ke rulana hargiz
