گرمی کی تپش بجھانے والی
سردی کا پیام لانے والی
Garmi ki tapish bujhane wali
Sardi ka payam lane wali
وہ شاخ و درخت کی جوانی
وہ مور و ملخ کی زندگانی
Wo shakh o darakht ki jawani
Wo mor o malakh ki zindagani
وہ آئی تو آئی جان میں جاں
سب تھے کوئی دن کے ورنہ مہماں
Wo aayi to aayi jaan mein jaan
Sab the koi din ke warna mehman
گرمی سے تڑپ رہے تھے جان دار
اور دھوپ میں تپ رہے تھے کہسار
Garmi se tadap rahe the jaandar
Aur dhoop mein tap rahe the kohsar
بھوبل سے سوا تھا ریگ صحرا
اور کھول رہا تھا آب دریا
Bhubal se siwa tha reg-e-sahra
Aur khaul raha tha aab-e-darya
سانڈے تھے بلوں میں منہ چھپائے
اور ہانپ رہے تھے چارپائے
Sande the bilon mein munh chhupaye
Aur hanp rahe the char-paye
تھیں لومڑیاں زباں نکالے
اور لو سے ہرن ہوئے تھے کالے
Thin lomdiyan zaban nikale
Aur lu se hiran hue the kale
چیتوں کو نہ تھی شکار کی سدھ
ہرنوں کو نہ تھی قطار کی سدھ
Cheeton ko na thi shikar ki sudh
Hirnon ko na thi qatar ki sudh
تھے شیر پڑے کچھار میں سست
گھڑیال تھے رود بار میں سست
The sher pade kachhar mein sust
Ghadiyal the rud-bar mein sust
ڈھوروں کا ہوا تھا حال پتلا
بیلوں نے دیا تھا ڈال کندھا
Dhoron ka hua tha haal patla
Bailon ne diya tha daal kandha
بھینسوں کے لہو نہ تھا بدن میں
اور دودھ نہ تھا گئو کے تھن میں
Bhainson ke lahu na tha badan mein
Aur doodh na tha gau ke than mein
گھوڑوں کا چھٹا تھا گھاس دانہ
تھا پیاس کا ان پہ تازیانہ
Ghodon ka chhuta tha ghaas dana
Tha pyas ka un pe taziyana
گرمی کا لگا ہوا تھا بھبکا
اور انس نکل رہا تھا سب کا
Garmi ka laga hua tha bhabka
Aur ans nikal raha tha sab ka
طوفان تھے آندھیوں کے برپا
اٹھتا تھا بگولے پر بگولا
Toofan the aandhiyon ke barpa
Uthta tha bagule par bagula
آرے تھے بدن پہ لو کے چلتے
شعلے تھے زمین سے نکلتے
Aare the badan pe lu ke chalte
Shole the zamin se nikalte
تھی آگ کا دے رہی ہوا کام
تھا آگ کا نام مفت بد نام
Thi aag ka de rahi hawa kaam
Tha aag ka naam muft badnaam
رستوں میں سوار اور پیدل
سب دھوپ کے ہاتھ سے تھے بے کل
Raston mein sawar aur paidal
Sab dhoop ke haath se the be-kal
گھوڑوں کے نہ آگے اٹھتے تھے پاؤں
ملتی تھی کہیں جو روکھ کی چھاؤں
Ghodon ke na aage uthte the paon
Milti thi kahin jo rookh ki chhaon
تھی سب کی نگاہ سوئے افلاک
پانی کی جگہ برستی تھی خاک
Thi sab ki nigah su-e-aflak
Pani ki jagah barasti thi khak
