زخم پر چھڑکیں کہاں طفلانِ بے پروا نمک
کیا مزا ہوتا، اگر پتھر میں بھی ہوتا نمک
Zakhm par chhidken kahan tiflan-e-be-parwa namak
Kya maza hota, agar patthar mein bhi hota namak
گردِ راہِ یار ہے سامانِ نازِ زخمِ دل
ورنہ ہوتا ہے جہاں میں کس قدر پیدا نمک
Gard-e-rah-e-yaar hai saman-e-naz-e-zakhm-e-dil
Warna hota hai jahan mein kis qadar paida namak
مجھ کو ارزانی رہے، تجھ کو مبارک ہوجیو
نالۂ بلبل کا درد اور خندۂ گل کا نمک
Mujh ko arzani rahe, tujh ko mubarak hojiyo
Nala-e-bulbul ka dard aur khanda-e-gul ka namak
شورِ جولاں تھا کنارِ بحر پر کس کا کہ آج
گردِ ساحل ہے بہ زخمِ موجۂ دریا نمک
Shor-e-jaulan tha kinar-e-bahr par kis ka ki aaj
Gard-e-sahil hai ba-zakhm-e-mauja-e-dariya namak
داد دیتا ہے مرے زخمِ جگر کی، واہ واہ!
یاد کرتا ہے مجھے، دیکھے ہے وہ جس جا نمک
Daad deta hai mere zakhm-e-jigar ki, wah wah!
Yaad karta hai mujhe, dekhe hai woh jis ja namak
چھوڑ کر جانا تنِ مجروحِ عاشق حیف ہے
دل طلب کرتا ہے زخم اور مانگے ہیں اعضا نمک
Chhod kar jana tan-e-majruh-e-aashiq haif hai
Dil talab karta hai zakhm aur mange hain aaza namak
غیر کی منت نہ کھینچوں گا پے توفیرِ درد
زخم، مثلِ خندۂ قاتل ہے سر تا پا نمک
Ghair ki minnat na khinchunga pa-e-taufir-e-dard
Zakhm, misl-e-khanda-e-qatil hai sar-ta-pa namak
یاد ہیں غالب! تجھے وہ دن کہ وجدِ ذوق میں
زخم سے گرتا، تو میں پلکوں سے چُنتا تھا نمک
Yaad hain Ghalib! tujhe woh din ki wajd-e-zauq mein
Zakhm se girta, to main palkon se chunta tha namak
