ہوئی تاخیر تو کچھ باعثِ تاخیر بھی تھا
آپ آتے تھے، مگر کوئی عناں گیر بھی تھا
Hui takhir to kuchh ba'is-e-takhir bhi tha
Aap aate the, magar koi inan-gir bhi tha
تم سے بے جا ہے مجھے اپنی تباہی کا گلہ
اس میں کچھ شائبۂ خوبیِ تقدیر بھی تھا
Tum se be-ja hai mujhe apni tabahi ka gila
Is mein kuchh shaiba-e-khubi-e-taqdir bhi tha
تو مجھے بھول گیا ہو تو پتا بتلا دوں؟
کبھی فتراک میں تیرے کوئی نخچیر بھی تھا
Tu mujhe bhul gaya ho to pata batla dun?
Kabhi fitrak mein tere koi nakhchir bhi tha
قید میں ہے ترے وحشی کو وہی زلف کی یاد
ہاں! کچھ اک رنجِ گرانباریِ زنجیر بھی تھا
Qaid mein hai tere wahshi ko wahi zulf ki yaad
Haan! kuchh ik ranj-e-giranbari-e-zanjir bhi tha
بجلی اک کوند گئی آنکھوں کے آگے تو کیا!
بات کرتے، کہ میں لب تشنۂ تقریر بھی تھا
Bijli ik kaund gai aankhon ke aage to kya!
Baat karte, ki main lab-tishna-e-taqrir bhi tha
یوسف اس کو کہوں اور کچھ نہ کہے، خیر ہوئی
گر بگڑ بیٹھے تو میں لائقِ تعزیر بھی تھا
Yusuf us ko kahun aur kuchh na kahe, khair hui
Gar bigaR baiThe to main la'iq-e-ta'zir bhi tha
دیکھ کر غیر کو ہو کیوں نہ کلیجا ٹھنڈا
نالہ کرتا تھا، ولے طالبِ تاثیر بھی تھا
Dekh kar ghair ko ho kyun na kaleja ThanDa
Nala karta tha, wale talib-e-tasir bhi tha
پیشے میں عیب نہیں، رکھیے نہ فرہاد کو نام
ہم ہی آشفتہ سروں میں وہ جواں میر بھی تھا
Peshe mein aib nahin, rakhiye na Farhad ko naam
Hum hi ashufta-saron mein wo jawan-mir bhi tha
ہم تھے مرنے کو کھڑے، پاس نہ آیا، نہ سہی
آخر اُس شوخ کے ترکش میں کوئی تیر بھی تھا
Hum the marne ko khaRe, paas na aaya, na sahi
Akhir us shokh ke tarkash mein koi tir bhi tha
ریختے کے تمہیں استاد نہیں ہو غالبؔ
کہتے ہیں اگلے زمانے میں کوئی میر بھی تھا
Rekhte ke tumhin ustad nahin ho Ghalib
Kahte hain agle zamane mein koi Mir bhi tha
