دل ہی تو ہے نہ سنگ و خشت، درد سے بھر نہ آئے کیوں؟
روئیں گے ہم ہزار بار، کوئی ہمیں ستائے کیوں؟
Dil hi to hai na sang-o-khisht dard se bhar na aaye kyun
Roenge hum hazar baar koi hamein sataye kyun
جب وہ جمالِ دل فروز، صورتِ مہرِ نیم روز
آپ ہی ہو نظارہ سوز، پردے میں منہ چھپائے کیوں؟
Jab woh jamal-e-dil-faroz soorat-e-mehr-e-neem-roz
Aap hi ho nazzara-soz parde mein munh chhupaye kyun
دشنۂ غمزہ جاں ستاں، ناوکِ ناز بے پناہ
تیرا ہی عکسِ رخ سہی، سامنے تیرے آئے کیوں؟
Dashna-e-ghamza jaan-sitan navak-e-naz be-panah
Tera hi aks-e-rukh sahi saamne tere aaye kyun
قیدِ حیات و بندِ غم اصل میں دونوں ایک ہیں
موت سے پہلے آدمی غم سے نجات پائے کیوں؟
Qaid-e-hayat-o-band-e-gham asl mein donon ek hain
Maut se pahle aadmi gham se najat paye kyun
حسن اور اس پہ حسنِ ظن، رہ گئی بوالہوس کی شرم
اپنے پہ اعتماد ہے غیر کو آزمائے کیوں؟
Husn aur us pe husn-e-zan rah gayi bulhawas ki sharm
Apne pe aitmaad hai ghair ko aazmaye kyun
واں وہ غرورِ عزّ و ناز، یاں یہ حجابِ پاسِ وضع
راہ میں ہم ملیں کہاں، بزم میں وہ بلائے کیوں؟
Waan woh ghuroor-e-izz-o-naz yaan ye hijab-e-paas-e-waza
Raah mein hum milen kahan bazm mein woh bulaye kyun
غالب خستہ کے بغیر کون سے کام بند ہیں
روئیے زار زار کیا؟ کیجئے ہائے ہائے کیوں؟
Ghalib-e-khasta ke baghair kaun se kaam band hain
Roiye zaar zaar kya kijiye haae haae kyun
