بازیچۂ اطفال ہے دنیا مرے آگے
ہوتا ہے شب و روز تماشا مرے آگے
Bazicha-e-atfal hai duniya mere aage
Hota hai shab-o-roz tamasha mere aage
جز نام نہیں صورت عالم مجھے منظور
جز وہم نہیں ہستیٔ اشیا مرے آگے
Juz naam nahin surat-e-aalam mujhe manzoor
Juz wahm nahin hasti-e-ashya mere aage
ہوتا ہے نہاں گرد میں صحرا مرے ہوتے
گھستا ہے جبیں خاک پہ دریا مرے آگے
Hota hai nihan gard mein sahra mere hote
Ghista hai jabeen khaak pe darya mere aage
مت پوچھ کہ کیا حال ہے میرا ترے پیچھے
تو دیکھ کہ کیا رنگ ہے تیرا مرے آگے
Mat poochh ki kya haal hai mera tere peechhe
Tu dekh ki kya rang hai tera mere aage
پھر دیکھیے انداز گل افشانیٔ گفتار
رکھ دے کوئی پیمانۂ صہبا مرے آگے
Phir dekhiye andaz-e-gul-afshani-e-guftar
Rakh de koi paimana-e-sahba mere aage
نفرت کا گماں گزرے ہے میں رشک سے گزرا
کیونکر کہوں لو نام نہ ان کا مرے آگے
Nafrat ka guman guzre hai main rashk se guzra
Kyunkar kahun lo naam na un ka mere aage
عاشق ہوں پہ معشوق فریبی ہے مرا کام
مجنوں کو برا کہتی ہے لیلیٰ مرے آگے
Aashiq hoon pa ma'shooq-farebi hai mera kaam
Majnun ko bura kahti hai Laila mere aage
خوش ہوتے ہیں پر وصل میں یوں مر نہیں جاتے
آئی شب ہجراں کی تمنا مرے آگے
Khush hote hain par wasl mein yun mar nahin jaate
Aayi shab-e-hijran ki tamanna mere aage
ہے موجزن اک قلزم خوں کاش یہی ہو
آتا ہے ابھی دیکھیے کیا کیا مرے آگے
Hai mauj-zan ek qulzum-e-khoon kaash yahi ho
Aata hai abhi dekhiye kya kya mere aage
گو ہاتھ کو جنبش نہیں آنکھوں میں تو دم ہے
رہنے دو ابھی ساغر و مینا مرے آگے
Go haath ko jumbish nahin aankhon mein to dam hai
Rahne do abhi saghar-o-meena mere aage
ہم پیشہ و ہم مشرب و ہم راز ہے میرا
غالبؔ کو برا کیوں کہو اچھا مرے آگے
Hum-pesha-o-hum-mashrab-o-hum-raaz hai mera
Ghalib ko bura kyun kaho achchha mere aage
