بسکہ دشوار ہے ہر کام کا آساں ہونا
آدمی کو بھی میسر نہیں انساں ہونا
Bas-ki dushwar hai har kaam ka asan hona
Aadmi ko bhi muyassar nahin insan hona
گریہ چاہے ہے خرابی مرے کاشانے کی
در و دیوار سے ٹپکے ہے بیاباں ہونا
Girya chahe hai kharabi mere kashane ki
Dar-o-diwar se Tapke hai bayaban hona
وائے دیوانگیٔ شوق کہ ہر دم مجھ کو
آپ جانا اُدھر اور آپ ہی حیراں ہونا
Waae diwangi-e-shauq ki har dam mujh ko
Aap jaana udhar aur aap hi hairan hona
جلوہ از بسکہ تقاضائے نگہ کرتا ہے
جوہرِ آئینہ بھی چاہے ہے مژگاں ہونا
Jalwa az bas-ki taqaza-e-nigah karta hai
Jauhar-e-aaina bhi chahe hai mizhgan hona
عشرتِ قتل گہِ اہلِ تمنا، مت پوچھ
عیدِ نظّارہ ہے شمشیر کا عریاں ہونا
Ishrat-e-qatl-gah-e-ahl-e-tamanna, mat puchh
Id-e-nazzara hai shamshir ka uryan hona
لے گئے خاک میں ہم داغِ تمنائے نشاط
تو ہو اور آپ بہ صد رنگِ گلستاں ہونا
Le gaye khak mein hum dagh-e-tamanna-e-nishat
Tu ho aur aap ba-sad rang-e-gulistan hona
عشرتِ پارۂ دل، زخمِ تمنا کھانا
لذتِ ریشِ جگر، غرقِ نمکداں ہونا
Ishrat-e-para-e-dil, zakhm-e-tamanna khana
Lazzat-e-rish-e-jigar, gharq-e-namakdan hona
کی مرے قتل کے بعد اس نے جفا سے توبہ
ہائے اس زود پشیماں کا پشیماں ہونا
Ki mere qatl ke baad us ne jafa se tauba
Haae us zud-pashiman ka pashiman hona
حیف اُس چار گرہ کپڑے کی قسمت غالبؔ!
جس کی قسمت میں ہو عاشق کا گریباں ہونا
Haif us chaar girah kapRe ki qismat Ghalib!
Jis ki qismat mein ho ashiq ka gareban hona
